FNEL Seejomes

Firwat wëlle mir als FNEL eng Association sans but lucratif ginn? +

Juristesch Sécherheet

Vun deem Moment un wou d’FNEL als asbl existéiert sinn net méi eenzel Persounen responsabel mee d’asbl selwer als nei Juristesch Persoun. Sou laang et keen juristeschen Kader fir d’FNEL gëtt sinn eenzel Leit mat hirem eegenen patrimoine gehale z.B.:

• bei engem Vertrag deen d’FNEL ënnerschreift, sinn di Leit gehalen di hir Ënnerschrëft drënner setzen (z.B. wann de Philippe oder de Raoul ënnerschreiwen kann keen aneren agéieren an si 2 eleng sinn engagéiert);
• am Fall vun engem Accident oder aneren Sinister (Feier oder Stuerm ...) sinn di Leit gehalen di responsabel waren fir den Event falls par impossible keng Assurance opkommen géing;
• déi eenzel Memberen vun der association de fait sinn responsabel fir d’Decisiounen déi kollektiv an der association de fait geholl ginn;
• Dat selwecht gëllt fir all aneren Gremium wei z.B. d’CoGro.

Di meescht Gruppen schéngen jo dovunner iwwerzeegt ze sinn, soss wieren si net selwer op dee Wee gaangen.

Eegestännegkeet

Den Statut vun der asbl erlaabt et der FNEL sëlwer als entité juridique ze handelen, Kontrakter uerdnungsgeméiss ofzeschléissen an als eegestänneg responsabel Persoun opzetrieden wat d’ Liewen vereinfacht (esou muss d’ Fondatioun net ëmmer a Projeten déi net zu hirem Objet gehéieren implizéiert ginn wann een eng personnalité juridique fir ze ënnerschreiwen brauch).

• Duerch hir Eegestännegkeet kann d’asbl selwer Member gi vun aneren ASBLe an juristeschen Organisatiounen, si kann ouni dass een e Problem doranner kann gesinn Subsiden ufroen an kréien (z.B. fir EU Projeten).

• Als asbl kann d’FNEL och selwer juristesch virgoen géint hir Vertragspartner oder Leit di der FNEL schueden. Dat ass als association de fait net méiglech.

• Keng eegen Verantwortung vun den Gruppen als Member. D’ Memberen vun enger asbl sinn duerch den Statut vun der asbl protegéiert : hir Responsabilitéit ass limitéiert op hir Cotisatioun an op di Suen di si der asbl ginn.

Keng perséinlech Responsabilitéit vun den Memberen vun den Féierungsleit

D’ Memberen an d‘Féierungsleit sinn no baussen net perséinlech responsabel fir d’ Engagementer vun der asbl (ausser am Fall vun engem graven Feeler oder eng strofrechtlech Dot).

Occasioun fir eng strukturéiert intern Organisatioun an eng bonne gouvernance

Dat heescht an aneren Wieder, dass d’ FNEL duerch hiren neien Statut als entité juridique eng aner Wichtegkeet kritt an nach méi gefuerdert ass fir sech eng gesond intern Struktur ze setzen, mat z.B. folgenden Reegelen :

• Eng nach besser, transparent an responsabel Administratioun an Gestioun
• den conseil d’administration (CoDir) als den « organe responsable» vis‐à‐vis vun den Gruppen als Memberen, muss Rechenschaft ofleeën an probéieren Interessekonflikter ze vermeiden an op alle Fall matdeelen,
• eng kloer Opdeelung vun den Aarbechten déi intern ausgeféiert gi (Kommiteeën/Aarbechtsgruppen mat kloren Missiounen) ass noutwendeg. Wat déi intern Organisatioun vun den Aarbechten ugeet si vill Konstellatiounen méiglech, d‘ Gesetz léist vill Flexibilitéit zou.

Méi Transparenz an kloer Kommunikatioun

wat d’Finanzgestioun an Interessekonflikter ugeet.

Méi grouss Kontroll

z.B. fir den Respekt vun den Wäerter an den Engagementer vun den Gruppen an deenen hiren eenzelen Memberen ze assuréieren.

Méi Vertrauen duerch méi Stabilitéit

ofgeséchert duerch den juristeschen Kader fillen déi aktiv Leit sech nach méi motivéiert kompetent no baussen opzetrieden an fir intern Stabilitéit an Sécherheet vun der Associatioun ze suergen.

Gesonden „risk management“

Aschätzung an Agrenzung vun Risiko op verschiddenen Niveauen.

Wat wieren eventuell Nodeeler? +

Administrativen Opwand

Den Statut vun der asbl bedeit méi bureaucratie an administrativ Organisatioun d.h., ënnert anerem,

• eng seriös Kontenféierung (wat mer schonns hunn);
• intern aktuell Datebanken (wat mer och schonns hunn);
• méi Dokumentatioun (z.b. bei der Delegatioun vun Ënnerschrëften ...) ;
• Verflichtungen duerch d’ Gesetz fir als asbl unerkannt ze ginn an kennen ze handelen :
• Verëffentlechung vun den Statuten (vun deem Moment un besteet d’asbl) an vun all Statutenännerungen;
• reegelméisseg Verëffentlechung vun der Lëscht vun den Gruppen di Member sinn an vun den Memberen vum organe de gestion (CoDir) vun der asbl FNEL beim GIE Luxembourg Business Registers (dat ass den organe gestionnaire vun den Datebanken vun den Gesellschaften an aneren juristeschen Persounen wie Associatiounen an Fondatiounen).

Well déi meescht Gruppen an der Tëschenzäit selwer als asbl fonctionéieren, misst dat net wierklech en Problem duerstellen.

Donatiounen vun iwwert 30.000 Euro ënnerleien verschidden Reegelen (ass bei Fondation AGGL-FNEL och de Fall)

Si mussen am Prinzip vum Minister de la Justice erlaabt ginn awer nëmmen am Fall vun enger Donatioun déi NET iwwert Virement bancaire vun enger autoriséierter Bank an der UE geschitt.

D’asbl als nei responsabel Persoun erliichtert d’Virgoen vun Drëtten

Et gëtt méi einfach fir géint FNEL virzegoen well si als asbl eng personne juridique ass. Dat sollt awer keen Probleem ginn. D’Zil vun der FNEL soll et jo net sinn enger Responsabilitéit ze entkommen an sech hannert eenzel Persounen ze verstoppen.

Opléisung vun der asbl

• Eng asbl kann duerch d‘ Geriicht opgeléist ginn a schlëmmen Fäll, z.B. wann se d’ Gesetz oder d’ Statuten net respektéiert, hir Engagementer net méi anhale kann, oder an aneren graven Situatiounen.
• D’ Opléisung vun der asbl kann duerch d’ Memberen gefrot gi (do ass awer am Prinzip eng Majoritéit vun 2/3 gefuerdert soss muss et iwwert d’ Geriicht goen wann d’ Konditiounen net erfëllt sinn).
• Am Fall vun enger Opléisung muss den Patrimoine vun der asbl zu engem änlechen Zweck affektéiert gi. D’ Memberen hu keen Recht op dësen Patrimoine.

Firwat mussen d’ Gruppen eng asbl sinn fir Member vun der FNEL asbl kënnen ze ginn? +

Fir Member an enger asbl ze sinn muss een juristesch existéieren. Wann dat eng physesch Persoun ass, dann ass et normalerweis kee Problem well déi dann och juristesch existéiert (si huet Rechter a Flichten). Fir awer den Donald Duck als Member vun enger asbl ze hunn, dat geet net. Wann elo e Grupp soll Member ginn an der asbl FNEL muss hien also och juristesch existéieren. E Grupp deen eng association de fait ass, existéiert juristesch esou wéineg wéi den Donald Duck. Dofir also d' Obligatioun sech als asbl ze constituéieren. Dat ass net terribel komplizéiert (muss z.B. net beim Notaire gemaach ginn) an d' Obligatiounen déi een dann huet wäerten am neie Gesetz, wat an der Maach ass, och vereinfacht ginn. D'FNEL huet och e Standard Model vun Statuten.

Wat geschitt mat den anere legale Strukturen (z.b. Fondation AGGL‐FNEL, ONGD‐FNEL asbl, an Les Amis de la FNEL asbl)?? +

Näischt. Dat eenzegt wat änneren soll ass fir aus der Federatioun eng juristesch Struktur ze maachen déi eng eegen juristesch Perséinlechkeet an en Eegenliewen kréien. D’ Iddie ass also NET fir un den bestoenden juristeschen Strukturen ronderëm d’ FNEL eppes ze änneren. Am Géigendeel. Si hunn all hiren eegenen Zweck an en Zesummeschloss géif eng enorm Iwwerfuerderung mat Aarbecht (haaptsächlech vum CoDir) vun der FNEL asbl bedeiten. Ganz wichteg dobäi ass: esou bleiwen och di eenzel juristesch Strukturen finanziell onofhängeg. Dat bedeit dass am Fall vun finanzielle Schwieregkeeten vun enger Struktur di aner Strukturen net impaktéiert ginn. Et gëtt also keen konsolidéierte Bilan gemaach.

Wat geschitt mat deenen FNEL’s Gruppen déi nach keng asbl sinn oder net wëllen Member an der neier asbl ginn? +

Et gëtt natierlech keen gezwongen matzemaachen. Et muss awer all Grupp eng asbl sinn (aus deenen selwechte Grënn wie d’FNEL) fir dann Member an der asbl FNEL ze sinn. Et wier also wënschenswäert dass all d’ Gruppe schonns als asbl konstituéiert wieren iert FNEL asbl gegrënnt gëtt. Wann elo deen een oder aneren Grupp nach keng asbl wier an d’asbl FNEL géif scho bestoen, dann misst een eng provisoresch Léisung ausschaffen fir dass och déi Gruppen op iergend eng Manéier mat der FNEL verbonnen wieren. Wann awer elo eenzel minoritär Gruppen géint den Projet asbl wieren dann misst een, am Fall wou den Projet asbl majoritär an definitiv gestëmmt géif, mat den eenzelen Memberen (Persounen) vun deenen Gruppen déi bereet wieren matzemaachen eng Léisung sichen.